பிரிவு வாரியான பதிவுகள்: நிகழ்வுகள்

தமிழர் ஒத்துழையாமை இயக்கம்

*விவசாயிகள் போராட்டம் வெல்லத் துணை நிற்போம்!*

*காவிரி, நெடுவாசல் – இந்திய அரசின் வஞ்சகம்*

*தமிழர் ஒத்துழையாமை இயக்கம்*

*இந்திய அரசின் பிரதமரும் அமைச்சர்களும் தமிழ்நாட்டிற்குள் நுழையக் கூடாது!*

*தமிழ்த் தேசிய விடுதலை இயக்கம் போராட்ட அறிவிப்பு!*

தமிழ்நாட்டின் விவசாயிகள் கோவணம் கட்டிக் கொண்டும் பிணங்களாய்ப் படுத்துக் கொண்டும் தில்லியில் போராடும் காட்சிகளை அன்றாடம் பார்த்து வருகிறோம். தஞ்சையிலும் விவசாயிகள் போராடிக் கொண்டிருக்கிறார்கள். தமிழகமெங்கும் விவசாயிகளுக்கு ஆதரவான போராட்டங்கள் எழுந்து வருவதும் தமிழகக் காவல்துறை அச்சுறுத்தி அடக்குவதும் நடந்து கொண்டுள்ளன. மெரினாக் கடலுக்குள் நின்று மாணவர்கள் போராடியது அடக்குமுறையை மீறி தமிழகத்தின் கொந்தளிப்பு பனிமலை முகடாய் வெளிப்பட்டதற்கான சான்றாகும்.

தில்லிக்கே வந்து அறவழியில் போராடிக் கொண்டிருக்கும் விவசாயிகளின் கோரிக்கைகளை இந்திய அரசு செயலளவில் காலில் போட்டு மிதித்துவிட்டது. *காவிரி மேலாண்மை வாரியம்* அமைக்க வேண்டும் என்பது விவசாயிகளின் தமிழக மக்களின் ஒருமித்த கோரிக்கை. மத்திய நீர்வளத்துறை அமைச்சர் உமாபாரதி சென்ற 15.03.2017 ஆம் நாள் நாடாளுமன்றத்தில் மாநிலங்களுக்கு இடையிலான ஆற்று நீர்ப் பூசல் சட்டத்தில் (1956) திருத்தத்திற்கான நோக்க அறிக்கையை முன்வைத்தார். இந்தத் திருத்தத்தில் கண்டுள்ளபடி இந்தியாவில் ஆற்று நீர்ச் சிக்கலுக்கு ஒற்றைத் தீர்ப்பாயம் அமைக்கப்படுமாம். இப்போதுள்ள தீர்ப்பாயங்கள் தோற்றுவிட்டதால் இந்த ஏற்பாடாம். அதாவது தமிழ் மக்கள் போராடிப் பெற்ற காவிரித் தீர்ப்பாயத்தின் தீர்ப்பு அரசிதழில் வெளியிடப்பட்டும் அதை நடைமுறைப்படுத்துவதற்கான காவிரி மேலாண்மை வாரியம் அமைக்காமல் இந்திய அரசு நயவஞ்சகமாய் நழுவிக் கொள்கிறது. ஆற்று நீர் உரிமைப் பறிப்புக்கு அந்த உரிமையையே இல்லாமலாக்குவதுதான் தீர்வு என்பதே இந்திய அரசு கண்டுள்ள வழி!

ஹைட்ரோ கார்ப்பன் திட்டத்தை முறியடிப்பதற்கான நெடுவாசல் போராட்ட எழுச்சி தமிழகத்திற்கே வழிகாட்டியது. எரிவாயு எடுப்பதற்கென்று சொல்லி விளைநிலத்தைப் பாழ்படுத்தும் விபரீதத் திட்டத்தை எதிர்த்து நெடுவாசலிலும் வடகாட்டிலும் மற்ற ஊர்களிலும் மக்கள் போராடினார்கள்.ஹைட்ரோ கார்பன் திட்டத்தால் ஏற்படும் பாதிப்புகளை இந்திய அரசாலோ தமிழக அரசாலோ மறுக்க முடியாத நிலையில் இந்தத் திட்டத்தை அனுமதிக்க மாட்டோம் என்றது தமிழக அரசு.மக்கள் விருப்பத்திற்கு மாறாக இதைச் செயல்படுத்த மாட்டோம் என்று இந்திய அரசின் சார்பில் அமைச்சர் பொன்.இராதாகிருஷ்ணன் உறுதி அளித்தார். போராட்டக் குழுவினரைத் தில்லிக்கும் அழைத்துப் போய் உறுதி வாங்கிக் கொடுத்தார். இந்த உறுதிமொழிகளை நம்பி மக்கள் தமது போராட்டத்தை ஒத்தி வைத்திருந்த நிலையில் இந்திய அரசு நெடுவாசல், காரைக்கால் உள்ளிட்ட ஹைட்ரோ கார்பன் திட்டத்தைச் செயல்படுத்துவதாக அறிவித்து ஒப்பந்தங்கள் செய்துள்ளது. குறிப்பாக நெடுவாசலில் ஜெம் லேப்ரட்டிரீஸ் என்ற தனியார் நிறுவனத்திடம் வேலையை ஒப்படைத்துள்ளது. மத்திய எரிசக்தித் துறை அமைச்சரும் நெடுவாசலில் ஹைட்ரோ கார்பன் திட்டத்தைச் செயல்படுத்தியே தீருவோம் என உறுதிபட அறிவித்துள்ளார். இது மக்கள் விருப்பம் பற்றிய குறைந்தபட்ச சனநாயகக் கண்ணோட்டத்தைத் தூக்கியெறிந்த அராசகச் செயலாகும். இதைத் தட்டிக் கேட்கும் முயற்சி கூட தமிழக அரசுக்கு இல்லை என்பது வெட்கக்கேடாகும்.

தமிழ்நாட்டின் உழவுக்கும் உழவர்க்கும் அதன்வழி தமிழ்நாட்டிற்கும் மன்னிக்கவே முடியாத துரோகம் செய்துள்ளது நரேந்திர மோதியின் இந்திய அரசு! இதை எதிர்த்துத் தமிழ் மக்கள் கிளர்ந்தெழ வேண்டும். இந்திய அரசின் சார்பில் பிரதமர் நரேந்திர மோதியானாலும் பிற மத்திய அமைச்சர்களானாலும் தமிழ்நாட்டுக்குள் அமைதியாக வந்து திரும்புவதை ஏற்க முடியாது. மீறி வந்தால் அவர்களை எதிர்த்துக் *கறுப்புக் கொடி ஆர்ப்பாட்டம்* நாடெங்கும் நடக்கட்டும்.

*தமிழ்த் தேசிய விடுதலை இயக்கம்* இத்தகைய போராட்டத்தை நடத்தும். மாணவர்கள், இளைஞர்கள், உழவர்கள், வணிகர்கள், பெண்கள், தோழமை அமைப்புகள், கட்சிகள், பொது மக்கள் அனைவரும் இதில் பங்கேற்க வேண்டுமென அன்புரிமையுடன் அழைக்கிறோம்.

வே.பாரதி
பொதுச் செயலாளர்
தமிழ்த் தேசிய விடுதலை இயக்கம்
31.03.2017

ஈகச் சுடர் திலீபன் நினைவு நாளில் (2015 செப்டம்பர் 26) ஒரு கூட்டறிக்கை

இருபத்தெட்டு ஆண்டுகள் முன்பு இந்திய-இலங்கை ஒப்பந்தத்தாலும் இந்தியப் படையிறக்கத்தாலும் தமிழீழ விடுதலைப் போராட்டம் சந்தித்த நெருக்கடியை வெற்றி கொள்ளச் சொட்டு நீரும் அருந்தாமல் பட்டினிப் போர் புரிந்து இன்னுயிர் தந்த திலீபன் நினைவாக –

திலீபனின் 28 ஆவது நினைவு நாளான சென்ற 26.09.2015 அன்று மாலை 6  மணியளவில்  சென்னை  தியாகராய நகரிலுள்ள செ. தெ. தெய்வநாயகம் பள்ளியில் தமிழ்த் தேசிய விடுதலை இயக்கம் நடத்திய  “வேண்டும் பன்னாட்டு நீதிப் பொறிமுறை” எனும் தலைப்பிலான கருத்தரங்கில்  தமிழீழ மக்களின் இன்றைய நீதிப் போராட்டத்தில் தோழமை கொண்டுள்ள தமிழக இயக்கங்கள், அமைப்புகள், அரசியல் கட்சிகள் சார்பில் இந்தக் கூட்டறிக்கையை வெளியிடுகிறோம்.

1)      கடந்த 2014 மார்ச்சில் ஐநா மனித உரிமை மன்றம் இயற்றிய தீர்மானத்தின் படி அமைக்கப்பட்ட புலனாய்வுக் குழு அளித்த அறிக்கையை மனித உரிமை மன்ற உயர் ஆணையர் திரு சையது ராத் அல் உசைன் கடந்த செப்டம்பர் 16ஆம் நாள் வெளியிட்டுள்ளார். சிங்களப் பேரினவாத சிறிலங்கா அரசுக்கு எதிராக நாம் இதுகாறும் கூறி வந்த பல்வேறு குற்றச்சாட்டுகளுக்குத் தக்க சான்றுகள் இருப்பதை இவ்வறிக்கை உறுதிப்படுத்தியிருப்பதை வரவேற்கிறோம். சட்டப் புறம்பான கொலைகள், வெள்ளை வேன் கடத்தல், சித்திரவதை, ஆண் பெண் இருபாலருக்கும் எதிரான பாலியல் வன்கொடுமை, உணவும் மருந்தும் கிடைக்க விடாமல் தடுத்தல், பயங்கரவாதத் தடுப்புச் சட்டம் போன்ற அடக்குமுறைச் சட்டங்கள்வழி மனித உரிமை மீறல், உள்நாட்டில் இடம் பெயர்ந்த மக்களைத் தமிழர் என்ற இன அடையாளத்திற்காகவே முகாம்களில் தடுத்து வைத்து விசாரணைக்கு உட்படுத்துதல், பாதுகாப்பு வளையங்கள் மீதும் மருத்துவமனைகள் மீதும் தாக்குதல் ஆகிய கொடுஞ்குற்றங்களில் சிறிலங்கா அரசும் படையினரும் ஈடுபட்டதாகக் குற்றஞ்சாட்டுவதோடு, இந்தக் குற்றங்களை அமைப்புசார் குற்றங்கள் என்றும் புலனாய்வு அறிக்கை வகைப்படுத்தியிருப்பதை வரவேற்கிறோம்.

2)      எந்த மன்றத்தில் இலங்கை அரசு போர் நடத்திய விதத்தைப் பாராட்டிக் கடந்த 2009 மே மாதம் தீர்மானம் இயற்றப்பட்டதோ, அதே மன்றத்தில் இலங்கை அரசு போர்க்குற்றங்களும் மானிட விரோதக் குற்றங்களும் புரிந்திருப்பதாகச் சொல்லும் அறிக்கை இப்போது முன்வைக்கப்பட்டிருப்பது உலகத் தமிழர்களின் அயரா உழைப்புக்கும் உறுதியான போராட்டத்துக்கும் கிடைத்துள்ள வெற்றி என்று உணர்கிறோம். எமது முயற்சிக்குத் துணைநின்ற உலகளாவிய மனித உரிமை ஆற்றல்களுக்கு நன்றி தெரிவித்துக் கொள்கிறோம். வல்லரசுகளின் புவிசார் அரசியல் சூதாட்டங்களை எல்லாம் மீறி, டப்ளின் தீர்ப்பாயம், ஐநா மூவல்லுனர் குழு, சார்லஸ் பெற்றியின் ஐநா உள்ளகத் தணிக்கை, அப்போதைய மனித உரிமை மன்ற உயர் ஆணையர் நவநீதம் பிள்ளையின் அறிக்கை, பிரேமன் தீர்ப்பாயம் … இவை எல்லாம் பாதை அமைத்துக் கொடுக்க, எமது நீதிக்கான பயணத்தில் இந்த மைல் கல்லை அடைந்துள்ளோம் என்பதை நன்றியுடன் நினைவுகூர்கிறோம்.

3)      நடந்திருப்பவை அமைப்புசார் குற்றங்கள், அதிகாரப் படிவரிசையில் இருப்பவர்கள் செய்த குற்றங்கள், தமிழர்களுக்கு எதிரான இனப்பாகுபாட்டு நோக்குடன் செய்த குற்றங்கள் என்றெல்லாம் புலனாய்வு அறிக்கை அறுதியிட்டுரைப்பது இலங்கையில் நடந்ததும் நடப்பதும் தமிழினப் படுகொலை என்பதையே காட்டுவதாக நம்புகிறோம். இனக்கொலைக் குற்றம் நடந்துள்ளது என்று புலனாய்வு அறிக்கை வரையறுக்காமல் விட்டது ஒரு குறைதான் என்றாலும், இனக்கொலை என்பதை இவ்வறிக்கை மறுக்கவில்லை என்பதும், அப்படி வரையறுப்பதற்கு மேலும் புலனாய்வு தேவை என்று உயர் ஆணையர் கூறியிருப்பதும் இந்த அறிக்கையின் அடிப்படையில் நாம் தொடர வேண்டிய நீதிப் போராட்டத்துக்கு ஊக்கமளிக்கும் என நம்புகிறோம்.

4)      சாட்சிகளுக்குப் பாதுகாப்பின்மை, பெருமளவிலான சர்வதேசச் சட்ட மீறல் குற்றங்களை விசாரிப்பதற்கு இலங்கையில் சட்டதிட்டங்கள் இல்லாமை, இலங்கை நீதிக் கட்டமைப்பின் நம்பகத் தன்மையற்ற நிலை ஆகிய காரணங்களால் உள்நாட்டு நீதிப் பொறிமுறை போதாது என்று கூறி சிறிலங்கா அரசின் கோரிக்கையை ஐநா மனித உரிமை மன்ற உயர் ஆணையர் மறுதலித்திருப்பதை வரவேற்கிறோம். அதே போது இதற்கென்று தனியாக ஒரு கலப்பு நீதிமன்றத்தை அமைக்குமாறு சிறிலங்காவைக் கேட்டுக்கொள்ளும் உயர் ஆணையரின் நிலைப்பாட்டை ஏற்பதற்கில்லை. நடந்துள்ள மனித உரிமைப் புலனாய்வைத் தொடர்ந்து குற்றப் புலனாய்வு செய்வதற்கும், குற்றவியல் நீதிமன்றத்தில் உசாவல் (வழக்கு விசாரணை) நடத்துவதற்கும் பன்னாட்டுப் பொறிமுறைதான் தேவை, அது அனைத்துலகக் குற்றவியல் நீதிமன்றமாகவோ, இலங்கை தொடர்பான தனித் தீர்ப்பாயமாகவோ இருக்கலாம். பன்னாட்டு நீதிப் பொறிமுறைக்கான போராட்டத்தைத் தொடர்ந்து உறுதியாக முன்னெடுப்பது தவிர உலகத் தமிழினத்துக்கு வேறு வழி இல்லை என்பதை அழுத்தமாகச் சுட்டிக்காட்ட விரும்புகிறோம்.

5)      ஐநா மனித உரிமை மன்றப் புலனாய்வுக்கு எவ்வகையிலும் ஒத்துழைக்காத சிறிலங்கா அரசிடமே கலப்பு நீதிமன்றம் அமைக்கும் பொறுப்பைத் தருவது பாலுக்கும் காவல், பூனைக்கும் தோழன் என்பது போன்ற நிலைப்பாடே தவிர வேறன்று. இலங்கை சொல்லும் உள்நாட்டுப் பொறிமுறைக்கும், உயர் ஆணையர் அவ்வரசின் பொறுப்பில் அமைக்கச் சொல்லும் கலப்புப் பொறிமுறைக்கும் விளைவளவில் வேறுபாடில்லை என்பதைச் சுட்டிக்காட்ட விரும்புகிறோம்.

6)      ஐநா மனித உரிமை மன்றப் புலனாய்வு அறிக்கை தமிழீழ விடுதலைப் புலிகளும் பல்வேறு கடுங்குற்றங்கள் புரிந்ததாகப் பட்டியலிடுகிறது. ஒடுக்குமுறையில் ஈடுபட்டுள்ள இனக் கொலைகார அரசின் நடவடிக்கைகளையும், இனக் கொலையிலிருந்து தம் மக்களின் உயிரும் உடைமையும் காக்க ஆயுதமெடுத்த விடுதலை இயக்கத்தின் செயற்பாடுகளையும் ஒரே துலாக்கோலில் நிறுத்துப் பார்க்க இயலாது என்ற வரலாற்றுப் பாடத்தை நினைவூட்ட விரும்புகிறோம்.

7)      ஐநா மனித உரிமை மன்றப் புலனாய்வு அறிக்கையில் இலங்கையின் ஆட்சி மாற்றத்தைக் கணக்கில் கொள்ளும் புவிசார் அரசியல் அழுத்தங்கள் தென்பட்ட போதிலும், இவ்வறிக்கை உறையிலிட்ட கூர்வாள் போன்றது, தமிழ் மக்களின் போராட்டம் வளர்ந்து செல்லும் போது இந்தக் கூர்வாள் இலங்கையை இரண்டாகக் கூறு போட்டு ஈழத்தை வென்றெடுக்கும் அற வலிமையை நமக்குத் தரக் கூடியது என்பதைக் காலம் மெய்ப்பிக்கும் என்று உறுதியாக நம்புகிறோம்.

8)      ஐநா மனித உரிமை மன்றப் புலனாய்வு அறிக்கையை ஒதுக்கித் தள்ளி விட்டு, இலங்கை அயலுறவுத் துறை அமைச்சர் மங்கள சமரவீராவின் அறிக்கையில் சிற்சில மாற்றங்கள் செய்து, வழமையான முன்னொட்டும் பின்னொட்டும் சேர்த்து வண்ணந்தீட்டித் தீர்மானம்’கொண்டுவந்துள்ள அமெரிக்க வல்லாதிக்கத்தின் வஞ்சனையை வன்மையாகக் கண்டிக்கிறோம். புலனாய்வு அறிக்கை வெளிவருமுன்பே, இலங்கைக்கு ஆதரவாகத் தீர்மானம் கொண்டுவரப் போகிறோம் என்று கொழும்பில் வைத்தே அமெரிக்க அமைச்சர் அறிவித்து விட்ட நிலையில் அமெரிக்காவின் கழுத்தறுப்பு எதிர்பார்த்த ஒன்றே.

9)      மனித உரிமை மன்ற உயர் ஆணையரின் அறிக்கையை வரவேற்பதாகவும், அவ்வறிக்கையின் பரிந்துரைகளை சிறிலங்கா செயலாக்க வேண்டுமெனக் கோருவதாகவும் தீர்மானத்தின் முதல் வரைவில் எழுதியதைக் கூட இரண்டாம் வரைவில் மாற்றி எழுதும் அளவுக்கு இலங்கை அரசை மட்டுமின்றி, அந்நாட்டின் சிங்களக் கட்சிகளையும் அரவணைக்க முற்பட்டுள்ளது அமெரிக்கா. அதேபோது புலிகளுக்கு எதிரான குற்றச்சாட்டுகளை விசாரிக்க வேண்டிய தேவையை அறிந்தேற்பதாகப் புதிய தீர்மான வரைவில் ஒரு தனிப் பத்தியை சேர்த்திருப்பதை… தமிழர்களின் அரசியல் பெருவிருப்பங்களைக் கொச்சைப்படுத்தி இனக்கொலை இலங்கைக்கு முட்டுக் கொடுக்கும் அமெரிக்க முயற்சி என்றே பார்க்க வேண்டியுள்ளது.

10)   இலங்கையின் வட மாகாண சபை சென்ற பிப்ரவரியில் இனக் கொலை குறித்து இயற்றிய தீர்மானத்தையும் அண்மையில் பன்னாட்டுப் புலனாய்வு கோரி இயற்றிய தீர்மானத்தையும் உளமார வரவேற்கிறோம். இதற்காக வட மாகாண முதல்வர் மாண்புமிகு விக்னேசுவரன் அவர்களையும் வட மாகாண சபை உறுப்பினர்களையும் பாராட்டுகிறோம்.

11)   ஈழத் தமிழர் துயரம் குறித்துத் தமிழக மக்களின் உணர்வுகளுக்கு உருவம் கொடுக்கும் வகையில் தமிழக சட்டப் பேரவை இதற்கு முன் இயற்றியுள்ள தீர்மானங்களையும், பன்னாட்டுப் புலனாய்வை வலியுறுத்தி அண்மையில் இயற்றிய தீர்மானத்தையும் உளமார வரவேற்கிறோம். இதற்காகத் தமிழக முதல்வர் மாண்புமிகு செல்வி செயலலிதா அவர்களையும் தமிழகச் சட்டப் பேரவை உறுப்பினர்களையும் பாராட்டுகிறோம்.

12)   மக்களால் தேர்ந்தெடுக்கப்பட்ட வட மாகாண சபையும் தமிழகச் சட்டப் பேரவையும் இயற்றியுள்ள தீர்மானங்களை மதித்து இனக்கொலைக்கு நீதிசெய்யப் பன்னாட்டுப் பொறிமுறையை வலியுறுத்தும் படியும், இதற்காக மனித உரிமை மன்றத்தின் இந்த அமர்விலேயே பொருத்தமான ஒரு தீர்மானம் கொண்டுவரும் படியும், இனக்கொலை இலங்கைக்கு ஆதரவான அமெரிக்கத் தீர்மானத்தை எதிர்த்து வாக்களிக்கும் படியும் இந்திய அரசை வலியுறுத்துகிறோம்.

13)   சிறிலங்காவை அனைத்துலகக் குற்றவியல் நீதிமன்றத்தில் கூண்டிலேற்றும் படி சிங்கள ஆக்கிரமிப்பில் உள்ள தமிழீழத் தாயகத்தில் ஒன்றரை இலட்சம் மக்களும், உலக அளவில் 14 இலட்சம் மக்களும் கையொப்பமிட்டு அளித்துள்ள விண்ணப்பத்தை ஏற்று ஆவன செய்யும் படி ஐநா மனித உரிமை மன்றத்தையும், பொதுப் பேரவையையும், பாதுகாப்பு மன்றத்தையும் கேட்டுக் கொள்கிறோம்.

14)   இலங்கை தொடர்பாக இதுவரை நடந்துள்ள நீதி விசாரணை, புலனாய்வு எதற்கும் சிறிலங்காவும் இந்தியாவும் ஒத்துழைப்பு நல்க வில்லை என்பதால், இவை முழுமை அடையவில்லை. ஆய்வுக்குரிய வரலாற்றுக் காலம் என்ற வகையிலும் இவை முழுமையற்றவையாகவே நிற்கின்றன. வட மாகாண சபைத் தீர்மானம் சுட்டியுள்ளவாறு கடந்த 1948 பிப்ரவரி 4 தொடங்கி இன்று வரை தொடரும் இனக் கொலை குறித்து ஒரு முழுமையான பன்னாட்டுத் தற்சார்பு விசாரணை தேவை என்பதை ஓர் அடிப்படைக் கோரிக்கையாக வலியுறுத்த விரும்புகிறோம்.

15)   பன்னாட்டு நீதிப் பொறிமுறையை வலியுறுத்தும் போதே, இந்தியாவும் இலங்கையும் புலனாய்வை சீர்குலைக்கச் செய்யும் முயற்சிகளையும் முறியடித்தாக வேண்டும் என்பதை மனித உரிமை மன்றமும் மற்ற அனைவரும் கவனத்தில் இருத்த வேண்டுகிறோம். .

16)   தமிழீழ மக்களின் நீதிப் போராட்டத்துக்கு முட்டுக்கட்டை போடுவதில் இந்திய அரசு வகித்து வரும் பெரும் பங்கை நன்கறிந்தவர்கள் என்ற முறையில் இந்த முட்டுக்கட்டையை நீக்குவதில் தமிழக மக்களுக்குள்ள தலைமைப் பங்கைத் தெளிவாக நினைவிற்கொண்டுள்ளோம்.

17)   தமிழீழ மக்களின் இனச் சிக்கலுக்கு ஒரே தீர்வு தமிழீழ விடுதலையே என்பதுதான் வரலாறு கற்பிக்கும் பாடம். முள்ளிவாய்க்கால் பேரவலமும், அது முதல் ஈடுசெய் நீதிக்காக நடந்துள்ள போராட்டமும், அண்மைய புலனாய்வு அறிக்கை, அமெரிக்கத் தீர்மானம் வரையிலான ஐநா நிகழ்வுகளும்… இதே உண்மையை மேலதிக வலியோடு உணர்த்தியுள்ளன. இந்தத் தீர்வை அமைதியான முறையில் சனநாயக வழியில் அடைந்திடத் தமிழீழத் தாயகத்திலும் புலம்பெயர் நாடுகளிலும் பொது வாக்கெடுப்பு நடத்தும் படி ஐநாவை வலியுறுத்துகிறோம்.

18)   தமிழர்களுக்கு உரித்தான நீதியை உலகம் சட்ட வழியில் பெற்றுத் தர தவறுமானால், எவ்வழியிலும் அதனை அடையும் அறவுரிமை அவர்களுக்கு உண்டு என்பதைத் தொடர்புள்ள அனைவருக்கும் நினைவூட்டக் கடமைப்பட்டுள்ளோம். அப்போது திலீபனின் இறுதி முழக்கமே எமதுமாகும்: மக்கள் புரட்சி வெடிக்கட்டும்!

உலகத் தமிழர் தாகம் தமிழீழத் தாயகம்!

கூட்டறிக்கையை ஏற்று கையொப்பமிட்ட தலைவர்கள்:

வைகோ
பொதுச் செயலாளர்
மறுமலர்ச்சி திராவிட முன்னேற்றக் கழகம்

தொல்.திருமாவளவன்
தலைவர்
விடுதலைச் சிறுத்தைகள் கட்சி

தி. வேல்முருகன்
தலைவர்
தமிழக வாழ்வுரிமைக் கட்சி

ஜே. ஹாஜா கனி
மாநிலச் செயலாளர்
தமிழ்நாடு முசுலீம் முன்னேற்றக் கழகம்

நிஜாம் முகைதீன்
பொதுச் செயலாளர்
சோசியல் டெமாக்ரடிக் பார்ட்டி ஆப் இந்தியா

வே.பாரதி
பொதுச் செயலாளர்
தமிழ்த் தேசிய விடுதலை இயக்கம்

பாலன்
பொதுச் செயலாளர்
கம்யூனிஸ்ட் கட்சி (மா-லெ) மக்கள் விடுதலை

தோழர் தியாகு
ஆசிரியர்
தமிழ்த்தேசம்

தமிழ்நேயன்
பொதுச் செயலாளர்
தமிழ்த் தேச மக்கள் கட்சி

நாகை திருவள்ளுவன்
பொதுச் செயலாளர்
தமிழ்ப் புலிகள்

செந்தில்
ஒருங்கிணைப்பாளர்
இளந்தமிழகம் இயக்கம்

அன்பு தனசேகரன்
தலைமைச் செயற்குழு உறுப்பினர்
திராவிடர் விடுதலைக் கழகம்

ஆழி செந்தில்நாதன்
ஒருங்கிணைப்பாளர்
மக்கள் இணையம்

தெய்வமணி
அமைப்பாளர்
அம்பேத்கர் சிறுத்தைகள் இயக்கம்

சௌ.சுந்தரமூர்த்தி
ஒருங்கிணைப்பாளர்
தமிழர் விடுதலைக் கழகம்

மா.சேகர்
ஒருங்கிணைப்பாளர்
குமுக விடுதலைத் தொழிலாளர்கள்

 

தமிழ் வழிக் கல்விக் கூட்டியக்கம் நடத்தும் தலைமைச் செயலக முற்றுகை போராட்டம் குறித்த பரப்புரைத் தெருமுனைக் கூட்டம்

14.08.2015 வெள்ளி மாலை5 மணியளவில் குமுகத் தொழிலாளர் விடுதலை இயக்கம் – தமிழ்த் தேசிய விடுதலை இயக்கம் சார்பில் திருவொற்றியூர் தந்தை பெரியார் பூங்காவில் தமிழ் வழிக் கல்விக் கூட்டியக்கம் நடத்தும் தலைமைச் செயலக முற்றுகை போராட்டம் குறித்த பரப்புரைத் தெருமுனைக் கூட்டம் நடைபெற்றது. தோழர்கள் அம்பேத்கர் சிறுத்தைகள் இயக்கம் தெய்வமணி, குமுகத் தொழிலாளர் விடுதலை இயக்கம் சேகர் ஆகியோர் உரையாற்றிய பின் தமிழ்த் தேசிய விடுதலை இயக்கப் பொதுச் செயலாளர் தோழர் வே. பாரதி சிறப்புரையாற்றினார்.

அரண் இயக்கம் சார்பில் மதுக் கடைகளை உடனடியாக அகற்றக் கோரி கையெழுத்து இயக்கம்

அரண் இயக்கம் சார்பில் சென்ற ஆகஸ்ட் 8 ஆம் நாள் மது ஒழிப்பின் ஒரு பகுதியாக பொள்ளாச்சி  உள்ள பெருமாள் செட்டி வீதி –  ராசா மில் சாலையில் தொடர் நெருக்கமாய் அமைந்துள்ள மதுக் கடைகளை உடனடியாக அகற்றக் கோரி கையெழுத்து இயக்கம் நடைபெற்றது. அரண் தோழர்கள் டாஸ்மாக் கடை எதிரிலேயே நின்று மக்களிடம் கையொப்பம் பெற்றனர். ஆகஸ்ட் 10 ஆம் நாள் பெற்ற ஆயிரம் கையொப்பங்களை பொள்ளாச்சி துணை ஆட்சியரிடம் அரண் இயக்கம் ஒப்படைத்தது. இச்செய்திகள் தினமணி, தினத்தந்தி, தினகரன் ஆகிய நாளிதழ்களில் வெளிவந்தது. அக்கடைகள் எடுக்கபடவில்லையாகின் தொடர்ந்து அதற்க்கான போராட்டத்தை அரண் முன்னெடுக்கும்.

முள்ளிவாய்க்கால் இனப்படுகொலையின் 6 ஆம் ஆண்டு நினைவு தினம்

முள்ளிவாய்க்கால் இனப்படுகொலையின் 6 ஆம் ஆண்டு நினைவு தினம் மே 19 செவ்வாய் அன்று தமிழ்த் தேசம் அலுவலகத்தில் நடைபெற்றது. முள்ளிவாய்க்காலை நினைவு கூறும் பாடல் ஒலிக்க அனைவரும் சுடரேந்தி அஞ்சலி செலுத்தினர். அனைவரின் சார்பாகத் தோழர் தியாகு பாலச்சந்திரன் படத்திற்கு மலர் தூவி வீரவணக்கம் செய்தார்.சென்னை மாவட்டச் செயலாளர் தோழர் குமரேசன் நாடு கடந்த தமிழீழ அரசாங்கத்தின் தலைமை அமைச்சர் ருத்ரகுமாரன் அவர்களின் நினைவு நாள் அறிக்கையினை வாசித்தார். தோழர் வே.பாரதி அறிமுக உரையாற்றிய பின் தோழர் தியாகு விளக்கவுரையாற்றினார். இறுதியாக அனைவரின் கேள்விக்கும் பதிலளித்தார். நிகழ்வை தோழர் ஜீவானந்தம் ஒருங்கிணைத்தார்.

 

20 தமிழர்கள் படுகொலையைக் கண்டித்து தலைமைச் செயலக முற்றுகைப் போராட்டம் – தமிழர் நீதிபெற அணிதிரள்வோம்!

வருகிற 16.04.2015 வியாழன் அன்று காலை 10 மணியளவில் தலைமைச் செயலக முற்றுகைப் போராட்டம் நடைபெற உள்ளது. படுகொலையான தமிழர்க்கு நீதி பெற நான் போராட்டக் களத்தில் அணிதிரள்வோம். தமிழ்த் தேசிய விடுதலை இயக்கம் சார்பில் போராட்டத்தில் பங்குபெற அன்புடன் அழைக்கிறேன். நமது கோரிக்கைகள்:

தமிழக அரசே!

1)இருபது தமிழர் படுகொலையில்  ஏழு பேர் தமிழக எல்லைக்குள் இருந்துதான் ஆந்திர காவல்துறையால் கைது செய்யப்பட்டுள்ளதால் தமிழக அரசு சார்பில் ஆள் கடத்தல், கொலை ஆகிய பிரிவுகளில் முதல் தகவல் அறிக்கைப் பதிவு செய்க.மீண்டும் பிரேதப் பரிசோதனை செய்ய நீதிமன்றத்தில் உடனடியாக முறையிடுக.

2)இது குறித்து இந்திய அரசிடம் சி.பி.ஐ விசாரணை கோருக.

3) தமிழக அரசு சார்பில் வழக்குரைஞர்கள், உயரதிகாரிகள் கொண்ட் குழு ஆந்திரச் சிறைகளில் அடைபட்டுள்ள ஆயிரக்கணக்கான தமிழர்களின் நிலையையும், அவர்கள் பற்றிய முழு விவரங்களையும் நேரில் சென்று பார்வையிட்டு அறிக்கை ஒன்றை வெளியிடுக. இது தொடர்பாக சிறைகளில் வாடும் தமிழர்கள் அனைவரையும் நிபந்தனையின்றி விடுதலை செய்யுமாறு ஆந்திர அரசை வலியுறுத்துக.

4)செம்மரம் வெட்டுவதற்கென்று அழைத்துச் செல்லப்பட்டுக்காணாமல் போனவர்கள் குறித்து வழக்குப் பதிவு செய்து மேல்நடவடிக்கை எடுத்திடுக.

5)இருபது தமிழர் படுகொலை தொடர்பாக ஆந்திர அரசைக் கண்டித்தும், இது தொடர்பான கோரிக்கைகளை வலியுறுத்தியும் தமிழகச் சட்டப் பேரவையில் தீர்மானம் நிறைவேற்றுக.

6) தமிழகத்தில் வாழ வழியற்று கூலிக்கு மரம் வெட்ட மாநிலம் விட்டு மாநிலம் செல்லும் நிலைக்குத் தள்ளப்படாதவாறு வடதமிழ்நாட்டு பழங்குடியினர் உள்ளிட்ட அடித்தட்டு மக்களின் வாழ்வைச் சீர்செய்ய சிறப்புத் திட்டங்கள் வகுத்து உடனடியாக நடைமுறைப்படுத்துக.

ஆந்திர அரசே!

1)சென்ற ஏப்ரல் 7 ஆம் நாள் திருப்பதி வனப்பகுதியில் மோதல்சாவு எனும் பெயரில் இருபது தமிழர்களைப் படுகொலை செய்த ஆந்திரச் சிறப்புக் காவல் படையினர் அனைவர் மீதும் கொலை வழக்குப் பதிவு செய்து அவர்களைச் சிறையிலடைத்திடுக. மேற்படி வழக்கின் புலனாய்வை சி.பி.ஐ வசம் ஒப்படைத்திடுக.

2)செம்மரம் வெட்டிய குற்றச்சாட்டுகளின் பேரில் ஆந்திரச் சிறைகளில் அடைக்கப்பட்டுள்ள ஆயிரக்கணக்கான தமிழர்களை உடனடியாக நிபந்தனையின்றி விடுதலை செய்க.

3)செம்மரக் கடத்தலில் ஈடுபட்டுவரும் உண்மைக் குற்றவாளிகளைக் கண்டறிந்து அவர்கள் மீது சட்டப்படி நடவடிக்கை எடுத்திடுக.

இந்திய அரசே!

1)இருபது தமிழர் படுகொலை தொடர்பாக ஆந்திர அரசுக்கு கண்டனம் தெரிவிக்க வேண்டும். இக்கொலை குறித்து சி.பி.ஐ புலனாய்வுக்கு உடனே ஆணையிடுக.

2)செம்மரக் கடத்தல் குறித்தும் இது தொடர்பாக நடந்துள்ள மோதல் கொலைகள் குறித்தும் பொறுப்பில் உள்ள உச்சநீதி மன்ற நீதிபதியைக் கொண்டு முழுமையான நீதி விசாரணை நடத்துக.

3)இந்திய அளவில் மோதல் கொலைகள் தொடர்பான தன் நிலைப்பாட்டை தெளிவுபடுத்தும் வகையில் வெள்ளை அறிக்கை வெளியிடுக.

4)உச்சநீதி மன்றம், உயர்நீதி மன்றம், தேசிய மனித உரிமை ஆணையம் ஆகியவைப் பிறப்பித்துள்ள ஆணைகளுக்கு இணங்க மோதல் கொலைகளைத் தடுக்கவும் தண்டிக்கவும் ஒரு தனிச் சட்டமியற்றுக.

தோழர் வே.பாரதி
பொதுச் செயலாளர்
தமிழ்த் தேசிய விடுதலை இயக்கம்
9865107107

நரேந்திர மோடியின் இலங்கைப் பயணத்தைக் கண்டித்து ஆளுநர் மாளிகை முற்றுகை

இந்திய அரசே! அரசுறவு, பொருளியல், கலை, பண்பாடு, விளையாட்டு, என அனைத்திலும் இலங்கையை புறக்கணி!

நரேந்திர மோடியின் இலங்கைப் பயணத்தைக் கண்டித்து  ஆளுநர் மாளிகை முற்றுகை.

13.03.2015 வெள்ளி காலை 10.00 மணி – ஆளுநர் மாளிகை

தலைமை: தோழர் தியாகு, ஆசிரியர் தமிழ்த் தேசம்.
ஒருங்கிணைப்பு: தமிழ்த் தேசிய விடுதலை இயக்கம்.

அனைவரும் வருக!!

boycott srilanka modi 2015

பெண் விடுதலையும் மண் விடுதலையும் – பெண்ணுரிமை எழுச்சிப் பொதுக்கூட்டம்

தமிழ்த் தேசிய விடுதலை இயக்கம் நடத்தும்

பெண் விடுதலையும் மண் விடுதலையும்

பன்னாட்டுப் பெண்கள் நாளில் (2015 மார்ச்சு 8, செங்கிப்பட்டி, தஞ்சை)

பெண்ணுரிமை எழுச்சிப் பொதுக்கூட்டம்

“ஆணும் பெண்ணும் நிகரெனக் கொள்வதால்   அறிவிலோங்கி இவ்வையம் தழைக்குமாம்”  — பாரதியார்.

ஆண்டு தோறும் மே முதல் நாளை உலகத் தொழிலாளர் நாளாகக் கொண்டாடுகிறோம். அதே போல் உழைக்கும் பெண்களுக்காகவும் ஒரு போராட்டத் திருநாள் உண்டு. அதுதான் மார்ச்சு 8ஆம் நாள்.

கடந்த 1910 ஆகஸ்டு மாதம் டென்மார்க் நாட்டின் தலைநகரம் கோபன்ஹேகனில் இரண்டாம் பன்னாட்டு உழைக்கும் மக்கள் சங்கத்தின் மாநாட்டுக்கு முன் கூடிய பன்னாட்டுப் பெண்கள் மாநாடு எடுத்த முடிவின் படி ஆண்டுதோறும் பன்னாட்டுப் பெண்கள் நாள் கொண்டாடும் நடைமுறை தொடங்கியது. இந்த முடிவுக்கு முக்கியக் காரணமாக இருந்தவர் செருமானியக் கம்யூனிஸ்டும் லெனினின் தோழருமான கிளாரா செட்கின் அம்மையார்.

கடந்த 1917ஆம் ஆண்டு மார்ச் 8ஆம் நாள் பன்னாட்டுப் பெண்கள் நாளை முன்னிட்டு உருசிய நாட்டில் செயிண்ட் பீட்டர்ஸ்பர்க் நகரில் உழைக்கும் பெண்கள் நடத்திய வேலைநிறுத்தப் போராட்டம்தான் உருசியப் புரட்சிக்கே தொடக்கமாய் அமைந்தது என்பது குறிப்பிடத்தக்க செய்தி.

தொடக்கக் காலத்தில் பெண்களின் வாக்குரிமைக்காகவும் பிற உரிமைகளுக்காகவும் பன்னாட்டுப் பெண்கள் நாளில் கிளர்ச்சிகள் நடைபெற்றன. உலகெங்கும் பெண்ணுரிமைக்கான, பெண்ணதிகாரத்துக்கான போராட்டம் இன்றளவும் தொடர்கிறது.

கடந்த 1977ஆம் ஆண்டு ஐநா பொதுப் பேரவை மார்ச்சு 8ஆம் நாளை உலகப் பெண்கள் நாளாகக் கொண்டாடும் படி அனைத்து நாடுகளையும் கேட்டுக் கொண்டது.

பெண்ணடிமை தீருமட்டும் பேசுந்திருநாட்டில் மண்ணடிமை தீராது என்பதை நெஞ்சிலேந்தித் தமிழின விடுதலைக்கான போராட்டத்தின் ஒரு கூறாகப் பெண்விடுதலைக்காகப் போராட வேண்டிய கடமை நமக்குள்ளது. இந்த நாளில்…

  • இனக்கொலைப் போரில் கைம்பெண்கள் ஆக்கப்பட்ட 90 ஆயிரத்துக்கு மேற்பட்ட தமிழீழப் பெண்களையும் பிற தமிழுறவுகளையும் …
  • இந்திய வல்லாதிக்க அரசின் இராணுவ அட்டூழியங்களுக்கு எதிராகப் போராடும் மணிப்பூர் மாதரசி இரோம் சர்மிளாவையும் காசுமீர் மற்றும் வடகிழக்கைச் சேர்ந்த பெண்களையும் …
  • அணு உலை ஆபத்துக்கெதிராக மூன்றாண்டு காலத்துக்கு மேல் போராடி வரும் இடிந்தகரைப் பெண்களையும் …
  • தமிழகத்திலும் இந்தியாவிலும் உலகமெங்கிலும் பாலியல் வன்கொடுமைகளுக்கு எதிராகத் தங்களைப் பாதுகாத்துக் கொள்ளப் போராடி வரும் பெண்களையும் …

நெஞ்சிலேந்தி அவர்களின் போராட்டங்களோடு தோழமை கொள்ள இந்தப் பன்னாட்டுப் பெண்கள் நாளில் உறுதி ஏற்போம்.

சிறப்புரை:
தோழர் வே.பாரதி,
பொதுச் செயலாளர்,
தமிழ்த் தேசிய விடுதலை இயக்கம்
பேச: 9715417170